Nsooka okwebaza abaweereza ba Ssaabasajja abategese olukuŋŋaana luno - Buganda Bumu North American Convention 2025 (BBNAC’25)
n’abo abazze nga bagutegeka okuva lwe gwatandika mu mwaka gwa 2015. Bannaffe mwebale nnyo omulimu guno ogw’ettendo. Namusa bonna abeetabye mu Buganda Bumu ono, naddala abatindizze eŋŋendo empaavu okujja okumwetabamu.
Omulamwa gwa BBNAC’25 ogwalondebwa “Okwaŋŋanga okusoomoozebwa kw’edwadde z’omutwe ne mukenenya” gujjidde mu kiseera kituufu kubanga gukwata ku bulwadde obumaze ekiseera nga butusoomooza n’okutaganjula empya zaffe.
Uganda ng’ensi obulwadde bw’emitwe ebadde tebutwaala nga kikulu okumala ekiseera. Ky’ewuunyisa nti emirundi mingi oluusi obubonero obw’enkukunala obulaga nti omuntu ayinza okuba nga yetaaga obuyambi bubusibwa amaaso.
Emirundi emirala abakugu mu nsonga zino tebeebuziibwako oba tebawulirizibwa. Abandi baalowoozanga nti okuba omulwadde w’omutwe omuntu alina kumala kugwa kazoole oba kugenda Butabika oba mu ddwaliro ly’omutwe olwo nekiryoka kikkirizibwa nti yeetaaga obuyambi.
So ng’ate abakugu mu nsonga eno tulina bangi mu Ggwanga naye ndowooza emirundi egisinga babuusibwa amaaso. Kalekisanyusa nnyo okulaba nga ensonga eno y’emu ku miramwa gy’olukuŋŋaana luno. Nsuubira nti tujja kuyiga n’okwongera okuzibulwa amaaso mu kwaŋŋaanga endwadde eno.
Endwadde ya mukenenya (HIV/AIDS) yali eddiridde naye kati tuwulira nti ezzeemu okutinta. Twebaza nnyo Ssaabasajja Kabaka olw’omulimu ogw’ettendo gw’akola mu kulwanyisa nnawookeera ono. Ebibala bya kawefube ono tutandise okubiraba mu masaza ga Ssaabasajja nga n’agebweru mw’ogatwalidde.
Omulamwa gw’olukuŋŋaana luno gujja kwongera okuyamba okutambuza enjiri y’okulwanyisa endwadde eno.
Ntuusa okulamusa okuva eri abakungu, abaami, n’abantu ba Ssaabasajja abawangalira mu Ssaza lya UK ne Ireland, era abamu basobodde okwetaba mu lukuŋŋaana luno.
Tubaagaliza olukuŋŋaana olulungi olujjudde ebibala n’essanyu ate bwe lunaaba luwedde, buli omu atuuke mirembe gye yavudde.
Ssaabasajja Kabaka Awangaale
Ssaalongo Geoffrey Kibuuka
Omubaka wa Kabaka mu UK ne Ireland