Obwakabaka bwa Buganda wamu n’ekitongole kya Akvo International ne GRUNFOS batongozezza ebyuma ebikozesa amaanyi g’enjuba, ebiyambako okufukiririza mu nnimiro mu biseera eby’ekyeya. Katikkiro wa Buganda ayise abalimi okwefunira ebyuma bino okulwanyisa ekiseera ekyeya n’okulwanyisa ebbula ly’amazzi mu byobulimi.
Obwakabaka bwa Buganda wamu n’ekitongole kya Akvo International ne GRUNFOS bawaddeyo ebyuma ebikozesa amaanyi g’enjuba, ebiyambako okufukiririza mu nnimiro mu biseera eby’ekyeya. Ebyuma bino bikozesa amaanyi g’enjuba okusobola okuyamba abalimi okwongera okufuna ebirime n’okukendeeza ebizibu ebiva ku kyeya.
Enteekateeka eno esuubirwa okugumya abalimi mu Buganda, okubasobozesa okukola obulimi obw’omulembe n’okuyita mu nkyukakyuka y’ensi y’obudde.
Omukolo gw’okutongoza enteekateeka eno guyindidde ku kyalo Ssango, Mawokota, era Omukubiriza w’Olukiiko lwa Buganda, Owek. Patrick Luwaga Mugumbule, ye yakiikiridde Katikkiro wa Buganda, Owek. Charles Peter Mayiga.
Mu bubaka obwasomeddwa, Katikkiro Mayiga yategeezezza nti Obwakabaka bwa Buganda bulina enteekateeka nnyingi ez’enjawulo ezigendererwamu okusitula embeera z’abantu ba Buganda kyokka wabaawo ebisoomooza eby’enjawulo nga n’ekimu kw’ebyo ly’ebbula ly’amazzi mu kisaawe ky’ebyobulimi.
Yasabye abalimi okwerinda ekiseera ekyeya nga beetegekera okufukiririza obulungi mu nnimiro zaabwe okusobola okukendeeza ku bifiirizibwa.
Katikkiro yeebaziza aba Child Welfare and Adoption Society olw’obumalirivu bwe bataddemu okufuula ennimiro omutereddwa ekyuma, nga eky’okulabirako ekivaamu ssente
awamu n’okugifuula ennimiro eyigirizibwamu abantu e Mawokota, abasiimye n’olwokulabirira abaana nga bayita mu Nsambya Babies Home.
Minisita wa Bulungibwansi, Obutondebwensi, Amazzi n’Ekikula ky’Abantu Owek. Hajjat Mariam Mayanja Nkalubo, akoowodde bannamawokota okuwaayo obudde okuyigira ku nnimiro eno mwe bagenda okusomesebwa okutambula n’enkyuukakyuuka y’embeera y’obudde.
Ekyuuma kino kiwereddwayo aba Akvo International ne GRUNFOS mu kaweefube w’okukuuma obutonde n’okuyamba abalimi okutambula n’enkyukakyuka y’obudde.
Omukolo guno gwetabiddwako n’Omubaka wa Denmark mu Uganda, HE. Signe Winding Albjerg, ng’ayogera ku mikwano egiriwo wakati wa Denmark ne Buganda mu bintu eby’enkulaakulana.