Ekifaananyi kya Rajiv Ruparelia wamu n’emmotoka ye eyayidde omuliro oluvannyuma lw’ekabenje
Obwakabaka bwa Buganda bukubagizza Sudhir Ruparelia olw’okufiirwa omwana we
Katikkiro wa Buganda, Owek. Charles Peter Mayiga, agambye nti okufa kwa Rajiv Ruparelia ky’ekikangabwa nnyo era kyalese obulumi obw’amaanyi, abazadde bwe bayitamu okufiirwa omwana.
Katikkiro Mayiga yateeseeko mu maka g’omusuubuzi Sudhir Ruparelia e Kololo ku Lwokutaano, nga 3 May 2025, okulaga obusaasizi n’okukubagiza amaka ku lw’Obwakabaka bwa Buganda.
“Okufa kwonna kubeera kikangabwa, naye omuzadde okufiirwa omwana, naddala mu mbeera ng’eno ey’akabenje, kizibu nnyo okutegeera n’okukikkiriza,” Owek. Mayiga bwe yagambye.
“Rajiv yafiira mu kabenje ka mmotoka oluvannyuma lw’okwetaba ku mbaga ya mukwano gwe. Yadda ewaka, alya ekyemisana n’ab’awaka, naye ekiro ekyo amawulire gazze nti yabadde afudde. Kiri mu bikangabwa ebya maanyi ennyo.”
Katikkiro Mayiga ng’atuuse mu maka g’e Kololo okukubagiza Sudhir Ruparelia
Owek. Mayiga yategeezezza nti Obwakabaka bukungubagira wamu ne Sudhir kubanga ono musajja wa Kabaka era awagira ensonga ez’enjawulo ezikwata ku Buganda.
“Ku lunaku olwo omwana we mwe yafiiridde, kitaawe Sudhir yali yeetabye ku Queen’s Ball – embaga y’okuyambisa eyategekebwa ekitongole kya Nnaabagereka Women’s Fund, gy’awaayo obukadde 25 okuva mu mutima okuwagira enteekateeka ezikwata ku by’obulamu bw’obwongo,” Owek. Mayiga bwe yategeezezza.
Yasabye Katonda agumye amaka g’afudde, n’alaga nti okufiirwa kwa Rajiv ky’ekikangabwa ekizibu nnyo okunyumirwa.
Katikkiro Mayiga ng’alamusa Sudhir Ruparelia ku mukolo gwa Queen’s Ball ogwategekebwa Nnaabagereka Women’s Fund
Rajiv Ruparelia, ow’emyaka 35, yafiiridde mu kabenje ku luguudo lw’e Busaabala mu ggombolola y’e Makindye Ssabagabo.
Yabadde avuga mmotoka ya Nissan GTR nnamba UAT 638L ng’ava Kajjansi okudda e Munyonyo. Emmotoka yatomedde ebiziyiza ku mabbali g’ekkubo, n’ebulwa buyinza, n’ekwata omuliro n’esaanawo ddala.