Owek. Kazibwe Kitooke nga awa endowooza y'Obwakabaka ku Buganda okuggyibwa ku maapu
Obwakabaka bwa Buganda, nga buyita mu Minisita w'Amawulire, Owek. Israel Kazibwe Kitooke, butangazizza ku nsonga za Buganda okuggyibwa ku maapu ya Uganda era ne bukakasa nti tewali asobola kuwangula Buganda mu Uganda ey'awamu.
Owek. Kazibwe yawa obubaka buno eri bannamawulire ku Bulange e Mmengo ku Mmande, oluvannyuma lwa maapu endala okufuluma nga Buganda teriiko.
Owek. Kazibwe agamba nti ensonga eno yaliwo dda, era Maasomoogi ku mazaalibwa ge ag’emyaka 63 yayogerako, n’alabula abakikola nti bakikola mu bukyamu. Kabaka yasaba Obuganda okwegendereza abantu abagenderera okuggyawo Buganda ku maapu.
Maapu ya Buganda
Ekitongole kya UBOS ekibala abantu mu Uganda kyavaayo ne kitegeeza Obwakabaka bwe kyategeera nti baali bafulumizza maapu eno mu bukyamu. Bwe baasisinkana Katikkiro Charles Peter Mayiga, baasaba ekisonyiwo era ne basuubiza okutereeza ensonga eno.
Wabula, maapu endala ezifulumye mu biseera by’akaseera kano zikiraga nga Buganda teriiko. Owek. Kazibwe ategeezezza nti abantu abakikola bagenderera okuggyawo Buganda ku mulamwa n’okulemesa enkolagana ezizza Buganda ku ntikko.
Minisita Kazibwe agumizza Obuganda nti tewali asobola kusangula Buganda ku maapu oba okugisanyaawo, kubanga ebyafaayo biraga enkizo ya Buganda mu kutondebwawo kwa Uganda eyaawamu.
