President wa Regis College, Antoinette M. Hays, oluvannyuma lw’okusisinkana abakungu b’Obwakabaka bwa Buganda
Obwakabaka bwa Buganda butandise kaweefube w’okubangawo omukago ne Regis College, ettendekero erisangibwa mu Massachusetts, America.
Olwaleero, ba Minisita b’Obwakabaka – Owek. Noah Kiyimba ne Owek. Joseph Kawuki – basisinkanye abakulu b’ettendekero lino ne babaako enteeseganya mwe beenyigira.
Ba Minisita bannyonyodde ebikwata ku Bwakabaka bwa Buganda ne balaga obwetaavu bw’enkolagana mu kutumbula eby’enjigiriza n’ebyobulamu, naddala nga bakolagana ne Muteesa I Royal University.
President wa University eno, Antoinette M. Hays, yasiimye ensisinkano eno era n’ategeeza nti beetegefu okukolagana n’Obwakabaka.
Yagambye nti enkolagana eno eyinza okuyambako mu kusomesa abasomesa (faculty training), okusomesa abayizi ku mutimbagano (online learning), okugezesa abayizi (internships), okuwanyisiganya mu byobuwangwa (intercultural exchange), okubangula abasawo n’ebirala.
Abakungu b’Obwakabaka ne Regis College nga bali wamu oluvannyuma lw’ensisinkano ey’omugaso.
President yalaze n’obwetaavu bw’okukyalira Muteesa I Royal University mu kiseera ekituuka.
Ensisinkano eno yakomekkerezeddwa n’okukkiriziganya nti Obwakabaka buwandiike mu butongole ku nsonga ezikkaanyiziddwako, okulaga obwetaavu bwabwo.
Ba Minisita babadde ne Owek. Henry Matovu Ndawula, Omubaka wa Kabaka mu Ssaza New England, n’omumyuka we Phionah Nattabi Kafeero, Dr. David Nyanzi ne Allen Namukasa.
President wa University yabadde ne Vice President for Academic Affairs Mary Erina Driscoll, Vice President for Communications Michael K. Guilfoyle, ne Vice President for Global Affairs.