Nabagereka wakati nga ali nabakya abenyigidde muntekateeka eno
Nnaabagereka Sylvia Nagginda atongozza kaweefube w’okusonda ensimbi Ókulwaanyisa endwadde zémitwe mu bannauganda.
Enteekateeka ya Nabagereka ey'okuyamba abantu abatawanyizibwa obulwadde obuva ku bwongo, etongozeddwa ku Serena hotel mu Kampala ,mu nkola etuumiddwa Nabagereka Fund, Queen’s Ball.
Omukolo gwokusonderako ensimbi zino gwetabiddwako abantu bangi ddala, ebitongole, n’abeekitiibwa n'abakungu ab'enjawulo.
Katikkiro mu kwogera kwe eri abantu abeetabye mu kijjulo kyokusonderako ensimbi z'okudduukirira abantu abalina obuzibu ku bwongo, agambye nti ekirabo ekisinga okuba ekyomuwendo bwe bulamu, omuntu kyasinza ebitonde ebirala bwe bwongo obutusobozesa okumanya ebyo ebitugasa wamu nokwawula ekituufu ku kikyamu.
Obwongo bwebutusobozesa okufuga ebitonde ebirala, n'olwensonga eyo obwongo kyekimu ku bitundu ebisinga okuba ebyenkizo ku bitundu byomubiri gwaffe.
Ensonga y'obulwadde bw'omutwe ekosa engeri obwongo bwaffe gyebwawulamu ensonga zetusanga olwo netusobola okumanya kyetusaana okukola, obungi mwetusaana okukikolera n'ekifo wetukolera ekintu ekyo.
Omumyuka wa Sipiika wa palamenti ya Uganda, Katikkiro n'omukubiriza wolukiiko lwa Buganda nabo babadewo
Agamba nti olutalo lwe tuliko lwa kuzza Buganda ku ntikko era lwetaaga abantu abalamu obulungi naddala aboomutwe ogukola obulungi, bakole ebyo ebibagasa era ebibazimba, balabirire aboomu maka gaabwe era bagase ebitundu byabwe eyo gyebabeera.
Mu nsi ezikyakula nga Uganda tetulina science wa maanyi atuyamba okutegeera endwadde enkumu ezitulumba, era mu Uganda n'Ensi za Africa abalwadde b'emitwe balowoozebwa okuba nti baabaloga oba batambulirako empewo.
Tusuubira enteekateeka eno ereeteddwa Nnaabagereka, egya kutuyamba okutunuulira obulwadde bw'Omutwe, okwekeneenya ekibuleeta ate nokubufunira enzijanjjaba entuufu.
