Katikkiro ng’ayogerako eri abayizi abatikkiddwa mu ttendekero lya Buganda Royal Institute, ng’abasoomooza okunyweza obumanyirivu bwabwe era babe abagumiikiriza okusobola okutuuka ku buwanguzi obw’enkalakalira
Katikkiro ng’ayogerako eri abayizi abatikkiddwa mu ttendekero lya Buganda Royal Institute, ng’abasoomooza okunyweza obumanyirivu bwabwe era babe abagumiikiriza okusobola okutuuka ku buwanguzi obw’enkalakalira
Katikkiro Charles Peter Mayiga yawabudde abayizi abatikkiddwa ku ttendekero ly’obwakabaka erya Buganda Royal Institute of Business and Technical Education okubeera abagumiikiriza baleme kubuguutana nga banoonya obugagga obw’amangu. Yabasabye babe bakkakkamu, banyweze obumanyirivu mu mirimu gyabwe, era bategeere nti obuwanguzi buva mu ntuuyo n’okwewaayo.
Kamalabyonna yategeezezza bino ng’atikkira abayizi abasoba mu 1,064 abakuguse mu masomo ga Diploma ne Certificate ku matikkira ag’omulundi ogw’e 19 aga Buganda Royal Institute.
Yagambye nti ensi yetaaga omuntu akozesa obukugu mu mirimu gy’alimu, era nagamba nti kisaanidde abayizi okutandikawo emirimu gyabwe nga bakozesa obukugu bw’okusomako, okwagala, n’obuyiiya.
Katikkiro yategeezezza nti enteekateeka y’eby’enjigiriza okuviira ddala ku bufuzi bw'amatwale yeyo ey'amasuuti, era bangi tebaategeeranga nti baasoma okujjako okulaba nga bambadde essuuti n’ettaayi.
Naye yagamba nti obuwanguzi tebulabikira ku masuuti n’ettaayi; omufumbi, omuzimbi, n’omuntu yenna asobola okwewaayo mu mirimu gy’alimu alina essuubi ly’okuwangula. Omuzimbi omulungi bwasasulwa afuna essanyu eriva mu ntuuyo ze.
Abamu ku batikkirwa nga bajaguza obuwanguzi bwabwe n’essanyu eringi oluvannyuma lw’amatikkira ga Buganda Royal Institute ag’omulundi ogwa 19
Ssenkulu w’ettendekero lino, Oweek. Joseph Balikuddembe Ssenkusu, yayongeddeko nti obuwanguzi Buganda Royal Institute bwetuuseeko mu myaka 25 bwesigamiziddwa ku buwabuzi bwa Ssaabasajja Kabaka, Kabineeti ye, n'obunyiikivu bw'abazadde okusasula ebisale by'abayizi ssaako n'okwewayo kw'abayizi okusoma ebyo ebisuubirwamu.
Minisita w’ebyenjigiriza n’enkulaakulana y’Abantu, Oweek. Choltilda Nakate Kikomeko, naye yategeezezza nti eddimu obwakabaka lye bwatandiseeko ery'okussaawo amasomero ga nnassale ku Masaza, lyetaaga abakugu abasobola okusitula omutindo gweby'enjigiriza mu masomero n'olwekyo abayizi abakuguse okuva ku Buganda Royal Institute balina omukisa munene okufuna emirimu mu masomero ago.
Omuyizi Nambiito Mary Clofa yasukkulumye ku banne n’obubonero bwa 4.45 GPA era yasiimiddwa kavu wa mitwalo ataano (UGX 500,000).