Owek. Katikkiro (owokubiri ku ddyo) ng’ayambadde ekanzu.
Owek. Katikkiro wa Buganda, Charles Peter Mayiga, asabye abantu okubeera abeegendereza obuteerabira Katonda n’abantu be bawereza nga bafunye ensimbi, ekitiibwa n’obukulembeze. Agambye nti ekitiibwa n’obugagga birina okugenda wamu n’obuweereza n’obuntu.
Okwogera bino abadde ku Luwala–Ggoli, Mawokota, mu bijaguzo eby’okukuza emyaka 50 egy’obusaserodooti bwa Rev. Fr. Denis Kyemwa, bwanamukulu w’ekigo ky’e Busubizi.
Katikkiro agambye nti okubeera mu buweereza obulungi okumala emyaka 50, mu kiseera nga abalala bali mu bufumbo n’obukulembeze obw’ensi, kyoleka obuzira n’obwesigwa obusaanidde okutenderezebwa.
Ow’Omumbuga akinogaanyizza nti obusaserodooti bulina ebigendererwa bingi, omuli okwewaayo obutaliimu kwagala nsimbi, era ebyo byonna birina okulabikira mu bikolwa, mu nneeyisa n’obukulembeze obulungi eri abantu abaweerezebwa.
Omujaguza, Rev. Fr. Denis Kyemwa, ng’ayaniriza Owek. Katikkiro.
Ng’ayogera ku mukolo guno, Katikkiro yagambye nti, “Omuntu ava ku birowoozo by’obugagga n’asalawo okuwereza Katonda n’abantu, omuntu azaalibwa mu ffamire ey’abaami n’asalawo obutawasa, oyo aba mutene ddala. Nkulisa nnyo omwana wange Rev. Fr. Denis Kyemwa olw’ennyisa n’obuweereza bw’akoze okumala emyaka 50 mu busaserodooti.”
Minisita wa Gavumenti ez’Ebitundu n’Ensonga za Buganda ebweru, Oweek. Joseph Kawuki, yeebazizza Rev. Fr. Kyemwa olw’amaanyi g’atadde mu kulwanyisa ababbi b’ettaka mu Ssingo, n’amutendereza olw’okuteekawo ekyokulabirako ekisaanidde buli mukulembeze.
Omusumba Lawrence Mukasa owa Kasana–Luwero, eyakulembeddemu missa, agambye nti Rev. Fr. Kyemwa ayagala nnyo Ekika kye eky’Engeye, era tabula ku mikolo gya kyo, ekiraga okunyikira kwe eri Obwakabaka bwa Buganda n’eddiini y’Ekikatoliki.
Ssaabasumba Augustine Kasujja agambye nti Rev. Fr. Kyemwa ava mu famire emulezi eyamukuumye n’okumuwagira ebbanga lyonna, era n’amwebaza olw’okunyikira obuweereza obw’emyaka emingi. Ye Omusumba w’e Kiyinda–Mityana, Anthony Zziwa, ng’akulembeddemu Abepisikoopi bonna mu ggwanga, agambye nti Rev. Fr. Kyemwa wa kwenyumirizaamu nnyo mu Klezia Katolika olw’emirimu emirungi gy’akoze okumala ebbanga eddene.
Ku mukolo guno kwabaddewo Minisita w’Enkulaakulana y’Abantu era avunaanyizibwa ku woofiisi ya Maama Nnaabagereka, Choltilda Nakate Kikomeko, abaami b’amasaza, omuli Hajji Hassan Kagga ne Oweek. Deo Kagimu, abakulembeze b’amadiini n’abakungu abalala bangi.