Katikkiro wa Buganda, Charles Peter Mayiga, ng’ali ku kisaawe kya Logan mu Boston, awerekeddwa abamu ku bakungu ababadde ku mukolo
Katikkiro wa Buganda, Owek. Charles Peter Mayiga, akomekkerezza obugenyi bwe mu Amerika gyeyabadde agenze okwetaba mu lukungaana lwa Buganda Bumu North American Convention (BBNAC).
Ku kisaawe kya Logan mu kibuga Boston, Katikkiro n’omumyuka we owookubiri era Omuwanika wa Buganda, Owek. Robert Waggwa Nsibirwa, basiibuddwa Omubaka wa Ssaabasajja mu Ssaza lya New England USA (erikolaamu Massachusetts, Rhode Island, New Hampshire, Connecticut ne Vermont), Owek. Henry Matovu Ndawula, ne Pulezidenti wa BBNAC, Omulongo Emmanuel Wasswa Kivumbi, wamu n’abalala.
Mu kiseera ky’amaze mu Amerika, Katikkiro asobodde okusisinkana abantu ba Kabaka n’okubatuusako obubaka bwa Ssaabasajja Kabaka.
Asisinkanye abakulira Boston College okulaba engeri y’okwongera enkolagana mu byenjigiriza, ate n’atuuza omwami w’Essaza New England, Owek. Henry Matovu Ndawula.
Owek. Mayiga ayogeddeko n’abayizi abasoma Oluganda mu Canada, ng’ayita mu Luganda Academy, era yetabye mu mboozi ey’akafubo n’Ababaka ba Kabaka mu bitundu ebyo.
Baminisita abaatambula ne Katikkiro nabo baliko emirimu egyenjawulo gyebakoze, naddala okusaka bannamikago, omuli: okusisinkana abakulu ba Regis College e Massachusetts, okwogerako n’aba Intelimas ku nsonga z’amalwaliro, n’okufunira abayizi ba Muteesa I Royal University abakugu mu by’obulamu bongere okubabangula.
Newankubadde emirimu mingi abakulu bano gyebakoze mu kiseera ekyo, baafissaawo akadde okwetaba ne Bannayuganda mu ngeri y’okwewummuzaamu ku lyato, wamu n’okusanyusibwamu.