Wanno Katikkiro nga ali mu kifaananyi ekyawamu n’ab’ekibiina kya Conservative Party
Katikkiro Charles Peter Mayiga azzeemu okukangula eddoboozi ku nsonga ya Federo, bw’asisinkanye bannakibiina kya Conservative Party abakyaddeko Embuga leero. Yategeezezza nti amawanga nga Switzerland ne Belgium, newankubadde matono ku Uganda, gagenda mu maaso mu nkulaakulana kubanga gakwatiridde ku musingi gwa Federo.
Bannakibiina kya CP, abakulembeddwamu Pulezidenti w’ekibiina Hon. John Ken Lukyamuzi, basisinkanye Katikkiro mu kisenge kya Kabineti e Bulange, Mmengo. Lukyamuzi yategeezezza nti bazze okwanjula akwatidde bendera ku bwa Pulezidenti, Elton Joseph Mabiriizi, wamu n’okutegeeza ensonga ez’okusimbyeko essira ng’ekibiina.
Ono yebazizza Obwakabaka lwa kuyimirira ku nsonga ya Federo, gy’agamba nti yandikuyamba okuggya Uganda mu bizibu by’erimu.
Mu nsisinkano eno, Katikkiro Mayiga yalambuludde nti Federo kitegeeza okugabana obuyinza nga buli kitundu kyekolera ku nsonga zaakyo, ate nga tetemaatema bantu nga bwe bigambibwa abamu. Yalumiriza nti ensi nnyingi ezikozesa Federo zikulaakulanye nnyo, era Uganda bw’egoberera nkola eno, ejja kukula mangu.
Katikkiro era yasaba Ssaalongo Elton Mabiriizi, akwatidde ekibiina bendera ku bukulembeze bw’eggwanga, nti bw’atuuka ku bukulembeze aleke buli kitundu kibeeramulire ebyakyo.
Yabuuzizza ku lwaki Gavumenti ey’awakati egulira abakulembeze b’ennono emmotoka, n’ategeeza nti ebitundu bisobola okwekolera ku nsonga zaabwe ne bifaako byabwe mu bwesimbu. N’amugamba nti:
“Bw’ogenda ku bwa Pulezidenti, tozzeeyo mu nkola ezizza emirimu mu Kampala yekka. Leka buli kitundu kibeeramulire mu bwesimbu.”
Owek. Katikkiro nga awa obubaka ku nsonga za Federo
Katikkiro Mayiga yeebazizza nnyo aba Conservative Party olw’okutuuka Embuga, wabula n’abasaba obutayimirira ku muwendo gw’abantu wabula ku mulamwa ogubakulembera. Agamba nti obunyweedde ku miggo gyabwe kye kijja okubaleetera abantu abalala okubagattako.
Ssaalongo Elton Joseph Mabiriizi yategeezezza nti ekibaleese Embuga kwe kufuna omukisa ogw’okwebaliza mu kaseera kano nga besimbyeewo, era nti Federo y’emulamwa gwe banyweredde ku kalulu kano.
Yajjukidde nti okuva mu myaka gye 1980 CP bweyatandikawo okulabika, omugenzi Owek. Mayanja Nkangi ye yabakulemberanga, era newankubadde bayise mu myaka gy’emiziziko bangi ne babadde tebalabika bulungi, tebakyusanga mulamwa.
“Ku mulundi guno tunoonya emikisa egiva mu Buganda n’eggwanga lyonna okutuuka mu bukulembeze obunene n’obuvunaanyizibwa,” bwe yategeezezza Mabiriizi.