Omukulu w’Ekika ky’Omutima, Omutaka Namugera Kakeeto Kasekende Nicholas, azze Embuga nga akulembeddemu bazzukulu be okwanjula olukiiko olufuzi olw’ekika oluggya eri Katikkiro wa Buganda, Owek. Charles Peter Mayiga, eyalondeddwa ng'omuwi w’amagezi omukulu w’ekika. Ensisinkano eno yabadde mu Kisenge kya Kabineeti mu Bulange e Mmengo.
Nga 18 Mutunda (September ) 2025, Ssaabasajja Kabaka yaweereza obubaka eri Abataka Abakulu b’Ebika era muno yakubiriza buli Kika okulonda ba Katikkiro, wamu n’enkiiko ze bakulembera nazo era abakulembeze abo banjulwe embuga mu butongole.
Ekika ky’Omutima kye kisoose okwanukula ennambika ya Ssaabasajja eno, era Omutaka Namugera Kakeeto owa 47 Nicholas Kasekende, agambye nti ekibaleese embuga kwe kulaga obuwulize eri Ssaabataka mu nsonga y’okutereeza obukulembeze mu bika.
Omutaka Kakeeto akubirizza bazzukulu be balonze ku lukiiko okukola enteekateeka ezikulaakulanya ekika n'okununula ebintu by'Ekika nga ettaka eririko abalyesenzaako.
Katikkiro Mayiga yebazizza Jjajja we obuvunaanyizibwa bw'amuwadde era n'asaba banne baalondeddwa nabo okwekwata ennyingo 4 (obwerufu, obuyiiya, obunyiikivu n'okukola n'okwagala) zibayambe okutuukiriza obuvunaanyizibwa obubaweereddwa.
Frederick Mujjuzi Kiteke y'alondeddwa okubeera Katikkiro w'Ekika, amyukibwa Ssaalongo Andrew Kaggwa, Owek. Charles Peter Mayiga ye muwi w'amagezi omukulu, amyukibwa Omuk. Salim Makeera, Owek. Damus Mulagwe ne Johnmary Luberenga Katikkiro w'Ekika omuwummuze. Olukiiko luliko n'abantu abalala ng'Omuwanika, Omuwandiisi n'abantu abalala okuli n'ababaka b'Omutaka mu masaza.