Minisita w’Obulimi, Owek. Hajj Amisi Kakomo, ng’asimbula abalimi okuva mu Buganda okugenda mu Kenya
Obwakabaka bwa Buganda bututte abalimi 80 e Kenya okwongera okuyiga ebyobulimi ebiri ku mutindo ogwa waggulu. Bano bakulembeddwamu Minisita w’Obulimi, Obwegassi, Obusubuuzi n’Obuvubi mu Buganda, Owek. Hajj Amisi Kakomo.
Minisita Kakomo abakuutidde okufaayo ku bigenda okubasomesebwa olwo bakomewo babiteeke mu nkola era abajjukiza omulanga gwa Ssaabasajja ku byobulimi okusitula embeera z’abantu be.
“Ekimu ku bigendererwa ebibatutte mu ggwanga lya Kenya kwe kussa mu nkola ekiragiro kya Kabaka eky’okutumbula ebyobulimu n’okusitula embeera z’abantu be,” Owek. Kakomo bwe yagambye.
Omumyuka wa ssentebe wa bboodi ya Kabaka Foundation era Omulabirizi wa West Buganda Diocese eyawummula Rt. Rev Bishop Henry Katumba Tamale, yeebazizza Obwakabaka olw’okwongera okufaayo eri abantu mu byobulimi ky’agamba nti batandise okuganyulwa mu nteekateeka nga eya mmwanyi terimba.
Abalimi bano nga batuuse e Kenya okutandika olugendo lw’okuyiga
Ye Ssenkulu wa Kabaka Foundation, Omuk. Eddie Kaggwa Ndagala, agamba nti kino kye kiseera abantu ba Ssaabasajja Kabaka okukomya embeera y’okusabiriza, kuba balina obusobozi okwetusaako buli kimu kye beetaaga kasita bamalirira.
Omubaka wa Busiro East mu Palamenti, Hon. Medard Lubega Ssegona, naye eyeegasse ku balimi bano. Agamba nti gavumenti erina obuvunanyizibwa bwa maanyi ddala okutumbula ebyobulimi n’okunoonya obutale okusobozesa abantu okuganyulwa obulungi mu bulimi bwe bamanyi obulungi ate nga n’ebyenfuna by’eggwanga kwe byesigamye.
Abalimi bano basookedde kulambula amalundiro g’ebisolo ag’enjawulo mu ssaza lya Githunguri e Nairobi — nga kuliko ente, embuzi, enkoko, embizzi n’ebisolo ebirala.
Abalimi nga balambula enimiro za banaabwe e Kenya, okuyiga n’okwongera amagezi
Eno yeemu ku nteekateeka z’okutumbula eby’obulimi n’obulunzi mu Buganda egwa mu mukago gw’ekitongole ki Kabaka Foundation n’ekitongole kya Heifer International Uganda ekivujjirirwa Mott Foundation esangibwa mu ggwanga lya America.