.Owek. Katikkiro Charles Peter Mayiga nga ayogerako eri abantu ba Buganda.
Ensimbi zino zivudde mu bantu ba Kabaka okuva mu gombolola eziri mu Buganda, amasaza ag’ebweru wa Buganda ne Uganda, amasomero, ebitongole n’ebibiina by’abantu eby’enjawulo.
Bw’abadde aggalawo oluwalo luno, Katikkiro Charles Peter Mayiga yebazizza abantu ba Buganda olw’obujjumbize mu nteekateeka z’Obwakabaka n’okussa mu nkola obubaka obuva Embuga. Agambye nti obubaka buno buyambye nnyo okutumbula eby’obulamu, nga kati omuwendo gw’abalina mukenenya gukendedde, era abasajja bangi batandise okwekebeza mukenenya, kookolo w’akatungulu n’endwadde endala.
Akoonye ku nkulaakulana abantu ba Kabaka gyebatuuseeko, ng’esigamiziddwa ku kulima emmwanyi, nga kino kiraga nti kaweefube wa mmwanyi terimba era ajjumbiddwa nnyo. Yongerako nti okulima n’okulunda nabyo bijjumbiddwa, ng’abantu ba Kabaka bafuna obubaka obusinga obungi nga bayita mu kukiika Embuga, mu nkola ya luwalo.
Ku nsonga z’okulonda, Katikkiro asabye abantu baleme kutya kulonda olw’emiggo, wabula bakuume obumu, kubanga ffenna tujja kusigala mu Uganda ng’abantu b’ekika kimu, awatali ku kwatibwa bujja. Agambye nti omwoyo guno gugwanidde okulabikira mu bibiina by’obufuzi ebiri mu ggwanga.
Owek. Hajji Mutaasa Kafeero nga akwasibwa satifikeeti.
Azzeemu okukiggumiza nti si kirungi kukuba bantu miggo olw’okuwagira omuntu gwebaagala, era n’okussaawo ebiragiro ebitasoboka tekiba bwenkanya.
Yebazizza nnyo ensimbi ezireeteddwa mu luwalo lw’omwaka guno, akawumbi n’obukadde lusanvu (1.7bn), ng’azigerageranya n’omwaka oguwedde ogwaleese obukadde 1.6. Agambye nti wadde Obwakabaka butasolooza musolo, oluwalo luyambako okutambuza emirimu gy’Obwakabaka emirala mingi.
Minisita wa Gavumenti ez’Ebitundu n’ensonga za Buganda ebweru, Owek. Joseph Kawuki, agambye nti enteekateeka y’omwaka guno etambulidde mu nkola ya “Tondeka mu Luwalo”, esobozesezza abantu bangi okwenyigiramu. Agambye nti abantu baleese ensimbi nnyingi nga bayita mu nkola eno, wabula bannabyabufuzi abayayanira ebifo by’obufuzi beenyigiddemu kitono olw’okuba mu kunoonya kalulu n’amateeka gabakugira.
Yebazizza Katikkiro ne Gavumenti ya Kabaka olw’obwerufu n’okwolesa federo ey’ebikolwa, ekiwadde abantu ba Buganda amaanyi okwenyigiramu. Yebazizza abaami ba Kabaka ku mitendera gyonna, n’ebiiko by’oluwalo olw’obuwulize n’obwagazi mu kukola omulimu Kabaka gweyabakwasa.
Omubaka omukyala owa Wakiso District, Betty Ethel Naluyima, agambye nti musanyufu olw’engeri Minisitule ya Gavumenti ez’Ebitundu mu Bwakabaka gy’etambuzaamu emirimu egy’ebikolwa, era n’asaba Gavumenti ya wakati etwale ekyokulabirako kino okusobola okutuusa obuweereza obwannamaddala eri abantu ba Uganda.
Gombolola Ssaabawaali Gombe ze zaaniriza abakiise ku mukolo guno, nga zafunye ebbaluwa n’ebirabo ebirala.
Gombolola ezikiise Embuga leero okuva mu Buganda zireese ensimbi obukadde 113,976,000, ate ezivudde ebweru wa Buganda ne Uganda zaabadde 40,747,142. Omugatte gwonna gwe bukadde 163,323,142.