Katikkiro nga ali n’Owek. Cotilda Nakate Kikomeko, wamu ne mukyala we, nga basiima abayizi abamazze nursery level.
Abazadde bajjukiziddwa mu biseera bino eby’oluwummula nti obuvunaanyizibwa bw’okukuza n’okugunjula omwana bw’akukwatira wamu, era bateekwa okuyigiriza abaana baabwe emirimu gye bakola, okubawagira okukuza ebitone byabwe n’okubamanyisa ebibakwatako; ng’obuwangwa bwabwe, olulimi n’ebirala.
Obubaka buno Owek. Cholitilda Nakate Kikomeko abuweeredde Bwebajja ku Kids and Love Daycare and Kindergarten, bwe babadde baggalawo olusoma olw’okusatu n’omukolo abaana kwe boolesezza ebitone byabwe n’ebimu ku byo bye basomye omwaka guno.
“Omwana akuzibwa ffe ffenna era tulina kukwatira wamu ku nkuza y’abaana, abasomesa nga bakola omulimu gwabwe naye n’abazadde nga batuukiriza obuvunaanyizibwa bwabwe ewaka—okuyigiriza abaana emirimu, olulimi lwabwe, obuwangwa, empisa ez’obuntu bulamu.” — Minisita Nakate
Owek. Nakate asinzidde wano era n’ategeeza nti abasomesa bakulu nnyo mu nkuza y’omwana era bonna balina okuyisibwa kyenkanyi kubanga okuviira ddala mu buto buli musomesa akwata ku mwana aliko ky’amuyigiriza. Ategeezezza nti Obwakabaka bwawaayo ebirowoozo eby’enjawulo eri Gavumenti ku byenjigiriza era ensonga y’okuyisa abasomesa ekyenkanyi mu misaala n’ebirala yali ku mwanjo dda.
Mu mbeera eno yebazizza abasomesa ku Kids and Love Daycare and Kindergarten olw’okuteekateeka obulungi abaana b’eggwanga mu myaka mukaaga gye bamaze mu kisaawe ky’ebyenjigiriza, era akuutidde abazadde okukuumirawo abaana baabwe baleme kubatambuzatambuza mu masomero mangi kubanga kikosa ensoma yaabwe.
Katikkiro Charles Peter Mayiga, omu ku batandisi b’essomero lino, asabye abazadde okugunjula obulungi abaana baabwe:
“Omwana bw’akola ekikyamu olina okumunenya n’okumubonereza ate ssi kumutulugunya, era bw’akola ekirungi olina okumwebaza n’omutegeeza nti akoze kirungi—kuno kwe kutegeka obulungi omwana.” — Katikkiro Charles Peter Mayiga
Owoomumbuga naye yebazizza abaaomesa abakola omulimu omunene mu kusomesa abaana ate ne bagattako n’okuvumbula ebitone byabwe era ne babayambako okubikuza. Wano asabye abazadde nabo okugatta ku mulimu abasomesa gwe babeera bakoze nabo okutegeka abaana baabwe obulungi ku lw’ebiseera eby’omumaaso.
Margaret Mayiga, naye omu ku batandisi b’essomero lino, ategeezezza nti mu kutegeka omukolo guno abaana kwe boolesezza ebitone byabwe, omulamwa baasalawo gubeere: ‘Obuvunaanyizibwa Obw’awamu mu Kukuza Omwana’, nga baluubirira okulaga omugaso gwa buli muntu mu kukuza omwana. Ono yebazizza abazadde ababeesigisa abaana baabwe era abawadde obweyamu nti baakwongera okuwa abaana baabwe ebyenjigiriza eby’omutindo. Ategeezezza nti okutandika n’omwaka ogujja 2026, bagenda kugattako Pulaimale ey’okutaano n’ey’omukaaga (P5 ne P6).
Ku mukolo guno abaana boolesezza ebitone eby’enjawulo mu kuyimba, amazina, kayemba, emizannyo, okuweereza ku mpewo, okwogera n’ebirala.
Kids and Love Daycare and Kindergarten e Bwebajja lyatandikibwawo Omuky. Margaret Mayiga ne bba Katikkiro Charles Peter Mayiga emyaka mukaaga egiyise.