Owek. Kaawaase nga alinabakozi bobwakabaka.
Olukubiriziddwa Omumyuka Asooka owa Katikkiro era Minisita avunanyizibwa ku nzirukanya y’emirimu mu Bwakabaka, Owek. Prof. Twaha Kaawaase Kigongo, olukungaana lutandise n’omusomo okuva mu woofisi ya Ssaabawolereza, ogwabadde gukwata ku ttaka n’engeri abaweereza ba Kabaka bwe bayinza okubeera mu nsobi mu kugula n’okutunda ettaka.
Owek. Kaawaase ategeezezza nti Ssaabasajja alina abakozi abasoba mu 1,700, era bagaambye nti basaana okwesunako okuweereza embuga. Yebazizza abaweereza mu Gavumenti ya Bwakabaka ku mirimu gye bakoze omwaka guno, n’abakuutira bulijjo okwetaba mu nteekateeka z’Obwakabaka zonna.
“Okukolera Obwakabaka kikuwa omutindo ng’omuntu ogukusobozesa n’okuwangula mu mirimu emirala. Kino kikwetaagisa okukuuma empisa, okukuuma obudde; okukolera awamu ne banno, okussa ekitiibwa mu bakama bo n’abo abali wansi wo, ate n’okugoberera ennambika ya Nnamutayika mu mirimu egikuweebwa,” Prof. Kaawaase agamba.
Mu kiseera ky’ebyobufuzi eggwanga kye lirimu, Owek. Kaawaase asabye abakozi okulaba nga banyweze obumu:
“Mwetabe mu kulonda, wabula mwewale obuvuyo.”
Prof. Kaawaase yanno wasinzidde n’ayanjula abakozi b’omwaka:
- Ekyokusatu: Mw. Ssenoga Kenneth
- Ekyokubiri: Mw. Dennis Ssebwana
- Omukozi w’omwaka mu Bwakabaka 2025: Mw. Kasaali Alex
Owek. Prof. Twaha Kaawaase Kigongo ne Alex Kasaali.
Minisita Noah Kiyimba naye eyetabye mu lukungaana luno, agambye nti:
“Omusaala si gwe gugenda okukugaggawaza, wabula kiki ky’okola mu budde bwo obulala, ate ne ssente z’ofuna ki ky’ozikozesa.”
Abasabye okusiga ensimbi, okwewagira mu kugula ebintu ku bannaabwe, n’obutaswaza Kabaka kubanga yasiima bamuweereze.
Ye Omuwandiisi Ow’enkalakkalira mu woofiisi ya Katikkiro era akulira abakozi mu Bwakabaka, Omuk. Josephine Nantege, yeebazizza abaweereza ku mirimu gye bakoze omwaka guno, era abasabye okulaba nga abaweereza okukuuma omutindo ng bakozesa obuyiiya okugatta ku mirimu gye bakola.
Omumukya w’omuwandiisi ow’enkalakkalira, Omuk. Peter Zzaake, awumbyewumbye nga yeyanza Ssaabasajja olw’okuteerawo abakozi emirimu gino. Yebazizza Katikkiro olw’obukulembeze obulungi, wamu ne Prof. Kaawaase olw’ennambika ennungi eri abaweereza, era asabye abaweereza okwefumiitiriza ku bubaka obubaweereddwa.